Kinders van alle ouderdomme oor die wereld heen ken die verhaal van Pinocchio, die houtseun met die neus wat al hoe langer rek. Hier word die verhaal met 'n duidelik Suid-Afrikaanse kleur oorvertel. Lesers wat dit al voorheen gelees het, sal weet watter avonture Pinocchio beleef, maar hulle mag dalk verbaas wees om uit te vind dat Sprinkaan saam met hom reis, of om te lees van die skelm Jakkals en Haas wat vas van plan is om hom op die verkeerde pad te bring. Pinocchio slaap een nag in 'n afgelee dorpie en drie wyse manne gooi vir hom die dolosse en gee hom raad. Suid-Afrikaners sal hulle tuis voel op hul reis saam met Pinocchio deur 'n Afrika-landskap, uitgebeeld deur Alzette Prins se stemmingsvolle en humoristiese illustrasies wat oud +en jonk sal geniet.